وروستي

د ښځي پت په حجاب کي دی‎

quransunnat.com د ښځي پت په حجاب کي دی‎

د ښځي پت په حجاب کي دی

ليکنه: عبدالمتين متين
درنو لوستونکو! تاسو ته څرګنده ده چي افغانستان د څو لسیزو په دوران کي تر بېلابېلو
 پړاوونو تېر سوی دی او بېلابېل دودونه پکښي پلي سوي دي. دا چي ښځه د ټولني کم توانه قشر دی، ځکه نو هر واکمن د خپل نظر ښکار کړې ده، په بېلابېلو دورانونو کي د بېلابېلو مشکلاتو سره مخ سوې ده. په دې وروستیو کي ښځو ته د دې زمینه برابره سوې ده چي وکولای سي هم کار وکړي او هم خپل عزت، پت او حجاب ساتلو تر څنګ خپل ورځني ژوند ته ادامه ورکړي، اسلامي حجاب واغوندي، د نارينه وو سره اوږه پر اوږه کار وکړي، البته د اسلام په چوکاټ کي. مولوي صاحب نورالدين چي د کندهار ښار په پيرو کلاچه کلي کي امامت لري، د ښځي حجاب د اسلام له نظره په شپږو برخو وېشي، چي هغه شپږ ډولونه په لاندي ترتيب سره دي:
۱- حجاب بايد ټول بدن پټ کړي. ۲- حجاب بايد نازک نه وي: د حجاب مطلب د بدن ستر دی داسي کومه پرده چي هغه بدن پټ نه شي کړای تر پردې لاندي وېښتان، جامې او نور ښکاري هغه ته حجاب نه شو ويلای. ۳- حجاب بايد زينتي او د جالب رنګ لرونکی نه وي چي د خلکو توجه خپل ځان طرف ته جلب کړي: د حجاب هدف دا دی چي د ښځي زينت او ښايست پټ کړي، نو داسي پرده چي هغه د ښځي زينت ته خلک جلبولای شي، حجاب نه بلل کېږي. ۴- حجاب بايد پراخ وي او تنګ نه وي: تر څو د بدن لوړي، تيټي برخي او د فتنې ځايونه ښکاره نه شي. ۵- د ښځي جامې بايد په عطرو نه وي لړلي: چي په نامحرمو يې بوی ولګي تر څو د خلکو د جلب سبب شي، ځکه دا عمل حرام دی او د دې عمل په اړه په احاديثو کي شديد الفاظ وارد شوي: رسول الله صلی الله عليه وسلم فرمايي: کله چه ښځه خوشبويي ووهي او د سړيو له ډلي تېرېږي، تر څو د هغې دغه ښه بوی خلک حس کړي، پس هغه داسي او هغسي ده، ډېره سخته او شديده وينا او په بل لفظ پس هغه زناکاره ده. ۶- د ښځي جامې بايد د نر له جامې سره هيڅ مشابهت ونه لري: ځکه چي په جامه کي د ښځي مشابهت له نر سره او د نر مشابهت له ښځي سره حرام دی. خو دا هر څه د هيواد په ډېرو ولايتونو کي برعکس وختل. موږ تاسي د هيواد په ډېرو ولايتونو کي په زيات شمېر افغاني ښځي وينو چي په داسي جامه کي ګرځي چي د اسلامي حجاب هيڅ څرک هم نه پکښي ليدل کېږي. په دې وروستيو کي داسي راپورونه هم خپاره سول چي په مرکز کابل کي د غربي ښځو يوه ټولنه افغان ښځو ته په بربنډ لباس اغوستلو يوه اندازه معاش د دې لپاره ورکوي چي دوی خپل لباس په افغاني ټولنه کي مروج کړي.

بل خوا ځيني کسان په ټولنيزو رسنيو کي هم د ښځي افغانى حجاب د ښځو په حق کي تېری بولي او وايي چي ښځي بايد له دې لباس څخه لاس پر سر شي. د دوی لپاره يوازي دومره وايم چي که چېري د دې خلکو څخه وپوښتل سي چي آيا ته خپله مور، خور او مېرمن په بازار کي د نورو له کلتور سره سم لباس کي ګرځول خوښوئ؟ معلومه خبره ده چي ځواب به يې نه وي. له دې څخه معلومېږي چي دوی هم د نورو کلتور خوښوونکي دي او بايد مخه يې ونيول سي. افغانستان چي يو اسلامي هيواد دی، بايد د ښځو د حجاب په وړاندي له اسلامي قانون څخه په زده کړه د ښځو لپاره حدود وټاکي. افغان دولت بايد هيڅ چا ته اجازه ورنه کړي چي زموږ تاسي د کلتور د خرابۍ لپاره ګام پورته کړي. زه د ښځو د کار او تعليم سره مخالف نه يم، خو هغه څه مي د يو افغان په صفت ډېر ځوروي چي زما د هيواد يو ناپوه ورور او يا هم خور د نورو د کلتور د خپراوي لپاره هلي ځلي کوي. راسئ نور په خپله ټولنه کي د داسي اشخاصو په وړاندي په کلکه ودرېږو، هيڅ چا ته اجازه ورنه کړو چي پردو جوړ کړی کلتور زموږ تاسي په اسلامي ټولنه کي باب کړي

څرګندونه مو لاندې وليکئ

ستاسو برېښناليک خوندي دی.


*