وروستي

آسانه نيکيانې (څوارلسمه برخه)

دکتور کفايت الله (وردګ)

د غزا اسانه لاره

په اسلامي شريعت کې غزا او جهاد داسې يو عبادت دى چې ډېر زيات ټينګ ايمان ، قوي جذبه ، کلکه اراده او په انسان کې غوره صفات غواړي نو که څوک نشي کولى د غزا ميدان ته لاړ شي نو د هغوى لپاره رسول الله صلی الله علیه وسلم غزا هم اسانه کړېده لکه د حضرت زيد بن خالد رضی الله عنه څخه روايت دى هغه فرمايي رسول الله صلی الله علیه وسلم فرمايل :
مَنْ جَهَّزَ غَازياً فيْ سَبيْلِ اللهِ فَقَدْ غَزَا، وَمَنْ خَلَفَ غازِياً فيِْ سَبِيْلِ اللهِ فَقَدْ غَزَا. متفق عليه

ترجمه : چا چې د الله جل جلاله په لاره کې يو غازي تيار کړو ده هم غزا وکوله او څوک چې د غازي په ځاى د هغه د کور خليفه شو (د هغه د کور مشکلات يې ورته حل کول) ده هم غزا وکوله .

اسانه شهادت

د شهيد او شهيدانو لپاره الله جل جلاله ډېرې لوړې مرتبې يادې کړي دي د هغوى لپاره يادې کړل شوې درجې چې انسان ولولي نو يقيناً چې د هر مؤمن زړه غواړي چې الله جل جلاله ورته دا لوړه مرتبه ورکړي په خاصه توګه مجاهدين کرام خو نه يوازې دا خوښوي چې الله جل جلاله ورته شهادت ورکړي بلکه په هروخت دعاء کې له الله جل جلاله نه په زاريو غواړي چې الله جل جلاله دوى ته شهادت ورکړي لکن ډېر ځله يو مجاهد په لسګونو ميدانونو کې شريک وي خو بيا هم الله جل جلاله ورته په جنګ کې شهادت ورنه کړي او ډېر ځله د يو مؤمن د زړه آرزو وي چې الله جل جلاله ده ته شهادت ورکړي خو مرګ ورته په بستره راشي د هغوى لپاره رسول الله صلی الله علیه وسلم يو ښه زېرى ويلى دى د حضرت سهل بن حنيف رضی الله عنه څخه روايت دى هغه فرمايي رسول الله صلی الله علیه وسلم فرمايل : مَن سَألَ اللهَ الشَهَادَةَ بِصِدْقٍ بَلَغَهُ الله مَنَازلَ الشهَدَاءِ وَإنْ مَاتَ عَلَى فراشه. رواه مسلم

ترجمه : چا چې د الله جل جلاله نه په رښتيا سره شهادت وغوښت الله جل جلاله به يې د شهيدانو مرتبو ته ورسوي اګر که هغه په خپله بستره باندې هم وفات شي .

غوره اعمال

له حضرت ابي هريره رضی الله عنه څخه روايت دى هغه فرمايي رسول الله صلی الله علیه وسلم فرمايل : مَن نَفَّسَ عن مؤمنٍ كُرْبَةً من كُرَبِ الدنيا، نَفَّسَ الله عَنه كُربةً من كُرَبِ يَومِ القيامة وَمَن يَسَّرَ عَلى معسرٍ، يَسَّرَ الله عَليه في الدنيَا وَالآخرة ومَن سَترَ مسلمًا، سترَهُ الله في الدنيَا وَالآخرة وَالله في عونِ العَبدِ مَا كانَ العَبدُ في عَونِ أخيه وَمَن سَلَكَ طَريقًا يَلتَمسُ فيه علمًا، سَهَّلَ الله لَه به طَريقًا إلى الجَنَة وَمَا اجتمعَ قومٌ في بَيتٍ من بيوتِ الله يَتلونَ كتَابَ الله ويَتَدَارَسونَهُ بَينَهم، إلَا نَزَلتْ عَلَيهم السَكينَة، وغَشِيَتهم الرَحمة، وَحفَّتهم المَلائكة، وَذكَرهم الله فيمَن عندَه وَمن بطَّأ به عَملُه، لم يُسرعْ به نَسَبه. رواه مسلم

ترجمه: چاچې له مؤمن څخه د دنيا کوم تکليف لرې کړو الله جل جلاله به ورڅخه د قيامت کوم تکليف لرې کړي.

چا چې په کوم تنګ لاسي باندې اساني راوسته الله جل جلاله به په ده باندې په دنيا او آخرت کې اساني راولي.

چا چې په يو مسلمان باندې پرده واچوله الله جل جلاله به ورباندې په دنيا او آخرت کې پرده واچوي.

الله جل جلاله د يو بنده په مرسته کې وي (د هغه نه مشکلات لرې کوي) ترڅو چې بنده د خپل ورور په مرسته کې وي.

څوک چې په کومه لاره باندې لاړل چې په هغه لاره کې يې د علم طلب کاوه الله جل جلاله به ورته پدې لارې سره جنت ته لاره اسانه کړي.

هېڅ قوم د الله جل جلاله له کورونو نه په کوم کور کې نه جمع کيږي چې دوى هلته د الله جل جلاله کتاب لولي او هغه سره درس کوي مګر الله جل جلاله په هغوى باندې اطمنان نازل کړي او هغوى په رحمت کې پټ شي او ملائکې په هغوى را چاپېرې شي او الله جل جلاله يې د هغه چا سره ياد کړي چې له هغه سره وي (فرښتې).

هغه څوک چې د خپل عمل له امله شا ته پاتې شي د هغه نسب دى نشي مخکې کولى

غوره عمل

له حضرت ابي مسعود رضی الله عنه څخه روايت دى هغه فرمايي رسول الله صلی الله علیه وسلم فرمايل : حُوسِبَ رَجلٌ ممَن كَانَ قَبلَكم، فَلَم يوجَدْ لَه منَ الخَيرِ شَيء، إلَا أنَه كَانَ يخَالطُ النَاسَ – وَكَانَ موسرًا – فَكَانَ يَأمرُ غِلمَانَهُ أن يَتَجَاوَزوا عَن المُعْسِر، قَالَ: قَالَ الله عَزَّ وَجَلَّ: نَحن أحَقُّ بذَلكَ منه، تَجاَوَزوا عَنه. رواه مسلم

ترجمه : لتاسې په مخکې امتونو کې له يو کس سره حساب وشو د هغه په عملونو کې له خير نه هېڅ شى پيدا نه کړل شول مګر يوازې دا چې ده به له خلکو سره کاربار کولو او دى مالدار وو بيا به يې خپلو هلکانو ته امر کولو چې (د پيسو اخيستلو په وخت کې) هغه چاته بښنه کوئ چې د هغه لاس تنګ وي رسول الله صلی الله علیه وسلم وفرمايل بيا (د حساب په وخت کې) الله جل جلاله ورته وويل : په بښنه خو له ده نه مونږ ډېر لائق يو چې بايد ويې کوو بس ترې ور تېر شئ .

په يو بل حديث کې حضرت ابو هريره رضی الله عنه فرمايي رسول الله صلی الله علیه وسلم فرمايل : كان تاجرٌ يُداينُ الناسَ، فإذا رأى مُعْسِرًا قال لفتيانه: تجاوزوا عنه لعلَّ الله أن يتجاوزَ عنا. فتجاوزَ الله عنه . صحيح البخاري

ترجمه : يو تاجر وو هغه به له خلکو سره قرضې کولې خو کله به يې چې يو داسې څوک وليدل چې لاس به يې تنګ وو نو خپلو کسانو ته به يې ويل ده ته ترې ور تېر شئ کېدى شي الله جل جلاله به مونږ ته تر ګناهونو را تېر شي بيا الله جل جلاله ده ته تر ګناهونو ور تېر شو .

نور بيا ان شاء الله

څرګندونه مو لاندې وليکئ

ستاسو برېښناليک خوندي دی.


*