پسرلی افغانستان کې د مرغانو لپاره د مرګ موسم

افغانستان کې د چاپېریال ساتنې اداره وايي، که څه هم حکومت د ښکار ممنوعیت امر کړی، خو وايي لا هم په هېواد کې پریمانه مرغان ښکار کېږي.

د کابل او کاپیسا تر منځ د لارې اوږدو کې داسې پلورنځي لیدل کېږي، چې ښکار شوي مرغان پلوري.

د کابل، کاپیسا لارې اوږدو کې د ځوانانو ډلې لیدل کېږي، چې له ښکاري ټوپکو سره باغونو کې ګرځي.

پسرلي کې مهاجر مرغان د افغانستان له لارې اوږده واټنونه وهي او له یوې سیمې بلې ته سفر کوي.

له کابله نژدې اویا کیلومتره لرې پروان او کاپیسا د پریمانه شنېلې او مناسبې هوا له کبله د مهاجرو مرغانو لپاره د دمې او یا هګیو لپاره مناسبې سیمې بلل کېږي.

ښکاریان د مرغانو تپولو لپاره هره ممکن لاره چاره کارووي. په یوه باغ کې مې یو ښکاري ولید، چې د ثبت شويو غږونو په وسیله یې د مرغانو پام وراړاوه.

د کاپیسا مرکز محمود راقي کې لسګونه کسان د سړک غاړې ته مړه او یا ژوندي مرغان پلوري.

ځايي خلک له بېلو تکتیکونو سره مرغان ښکاروي.

ځينې ښکاریان د چره يیزو ټوپکو په وسیله ښکار کوي او ځينې نور بیا دامونه او لومې کارووي.

کله نا کله ښکاریان د ښکاري مرغانو په وسیله مهاجر مرغان ښکاروي.

سږ کال د مرغانو شمېر ډېر شوی دی، خو ښکاریانو هم ورته د لومو ښوولو نوې لارې چارې موندلې دي.

بېلا بېل مرغان په بېلابېلو بیو پلورل کېږي، چې له ۱۵ افغانیو تر ۵۰۰ افغانیو پورې رسېږي.